Muling naging tampok sa social media ang magkahiwalay na pahayag nina Dr. Nuelle Duterte at Vice President Sara Duterte, matapos batikusin ni Nuelle ang mga pahayag ng kanyang pinsan kaugnay ng umano’y pangamba nito para sa kanyang kaligtasan.
Sa statement ni Dr. Nuelle, direkta niyang sinabi:
“I heard The Hague is a safe place. Look at your Tatay. He’s fine. No one has tried to kill him there. Go pick up Bato before you go since he also fears for his safety in the Philippines apparently. Safe na safe kayo doon.”
Kasunod ito ng naging pahayag ni VP Sara noong Setyembre 5 na “I do not feel safe” at “Pakiramdam ko papatayin nila ako,” habang humaharap siya sa Quezon City Hall of Justice upang magpiyansa sa kasong grave threats. Sinabi rin ng bise presidente na mayroon siyang mga naitalang banta at umano’y harassment mula pa noong 2023 at nag-aalala siya para sa kaligtasan ng kanyang mga anak.
Ang mga pahayag ni Sara ay dumating matapos maglabas ng warrant of arrest ang Quezon City Regional Trial Court Branch 98 kaugnay ng tatlong bilang ng grave threats. Ayon sa mga ulat, nagpiyansa siya ng ₱120,000 bawat bilang, o kabuuang ₱360,000, at kalaunan ay na-lift ang warrant matapos makapagpiyansa.
Sa kanyang isa pang pahayag, pinuna rin ni Dr. Nuelle ang sitwasyon at sinabi:
“She was issued a warrant of arrest and given the chance to receive due process. Marcos kapag siya ang nagbabanta, pero duwag kapag humaharap sa tamang proseso ng batas.”
Ang kasong kinakaharap ni VP Sara ay may kaugnayan sa kanyang mga pahayag noong 2024 tungkol kina Pangulong Ferdinand Marcos Jr., First Lady Liza Araneta-Marcos at dating House Speaker Martin Romualdez. Iginiit naman ni Sara at ng kanyang kampo na ang mga kaso laban sa kanya ay bahagi ng umano’y political harassment, habang nagpapatuloy ang kanyang paggamit ng mga legal na remedyo.
Samantala, sinabi ng Philippine National Police na wala itong namonitor na verified threat laban kay Sara o sa kanyang pamilya, at ayon sa PNP, wala ring naiulat sa kanila ng bise presidente na partikular na banta sa kanyang buhay o kaligtasan ng kanyang pamilya.
Ang banat ni Dr. Nuelle ay dagdag sa matagal nang pagiging lantad niya sa pagbibigay ng mga pananaw na hindi palaging kaayon ng ilang miyembro ng kanyang sariling pamilya. Sa pagkakataong ito, ang usapin ng kaligtasan ni VP Sara at ang kanyang kinakaharap na legal na proseso ang muling naglagay sa magpinsan sa magkasalungat na panig ng pampublikong diskurso.
