MANILA — Sa ikaanim na linggo ng impeachment trial ni Vice President Sara Duterte, dalawang state auditor mula sa Commission on Audit (COA) ang iniharap ng prosecution bilang mga testigo kaugnay ng alegasyon ng maling paggamit at maling paglalaan ng confidential funds.

Sina Roderick Wamil at Xylene Mae del Campo ay kapwa may karanasan sa pag-a-audit ng confidential funds, kabilang ang mga pondong pinangasiwaan ng Office of the Vice President (OVP) at Department of Education (DepEd).

## Sino si Roderick Wamil?

Si Wamil, 34, ay kasalukuyang audit team leader sa COA-Pasay City. Mahigit 11 taon na siya sa COA matapos sumali sa ahensya noong 2014.

Nagtapos siya ng Bachelor of Science in Accountancy sa Central Luzon State University at kumuha rin ng Juris Doctor degree sa Arellano University.

Bago naging audit team leader, nagsilbi si Wamil bilang state auditor sa COA-Intelligence and Confidential Funds Audit Office (COA-ICFAO), ang tanggapan na nakatutok sa pag-a-audit ng intelligence at confidential funds.

Mahalaga ang kanyang naging papel sa paglilitis dahil nakatuon ang kanyang testimonya sa kanyang karanasan sa pag-a-audit ng confidential fund disbursements.

Bahagi ito ng pagsisikap ng prosecution na patunayan ang mga alegasyon sa Article I ng impeachment complaint, na nag-aakusa kay Duterte ng umano’y maling paggamit at maling paglalaan ng confidential funds.

In-audit ni Wamil ang liquidation ng confidential funds ng OVP para sa ikaapat na quarter ng 2022 at unang tatlong quarter ng 2023.

In-audit din niya ang confidential funds ng DepEd para sa unang tatlong quarter ng 2023, noong sabay na nagsilbi si Duterte bilang Vice President at Education secretary.

Noong Pebrero 2024, inilipat si Wamil sa ibang tanggapan sa loob ng COA.

## Sino si Xylene Mae del Campo?

Kasunod ng testimonya ni Wamil, iniharap naman ng prosecution si Xylene Mae del Campo bilang ikalawang testigo mula sa COA.

Si Del Campo, 36, ay state auditor sa COA-ICFAO at siyang pumalit sa posisyong iniwan ni Wamil matapos itong mailipat noong Pebrero 2024.

Siya ang nagpatuloy sa pag-a-audit sa confidential funds ng OVP at DepEd na sinimulan ni Wamil.

“Siya po ang nagtuloy ng inumpisahan ni Mr. Wamil na evaluation ng confidential funds,” sinabi ni prosecution private counsel Lorna Kapunan noong Miyerkules, Agosto 6.

Nagtapos si Del Campo ng Bachelor of Science in Accountancy sa Saint Louis University. Labindalawang taon na siyang nasa COA matapos magsimulang maglingkod bilang state auditor noong Agosto 2014.

Kabilang sa kanyang naging trabaho ang pagsusuri sa tugon ng OVP sa unang COA Notice of Suspension noong Disyembre 2023 kaugnay ng confidential funds nito para sa Disyembre 2022.

## Pokus sa confidential funds

Ang testimonya nina Wamil at Del Campo ay nakatuon sa proseso ng pag-a-audit at pagsusuri ng COA sa paggamit at liquidation ng confidential funds ng OVP at DepEd.

Mahalaga ang kanilang mga pahayag sa paglilitis dahil sinusubukan ng prosecution na maipakita kung may mga iregularidad sa paggamit ng naturang pondo at kung paano tumugon ang mga tanggapan sa mga obserbasyon at notice na inilabas ng COA.

Sa pamamagitan ng kanilang testimonya at mga dokumentong isinumite sa impeachment court, inaasahang susuriin ng mga senador na nagsisilbing impeachment court kung may sapat na batayan ang mga alegasyon laban kay Duterte kaugnay ng paggamit ng confidential funds.

MANILA, Philippines — Sa loob ng halos limang dekada sa larangan ng batas, nakilala si Atty. Lorna Patajo-Kapunan bilang isa sa mga batikang abogado sa bansa, partikular sa larangan ng litigation, intellectual property, corporate at commercial law, gayundin sa pagtatanggol sa karapatan ng kababaihan at mga bata, kalikasan, artista at iba’t ibang sektor ng lipunan.

Nagtapos si Kapunan ng AB Political Science sa University of the Philippines noong 1973 at ng Bachelor of Laws noong 1978. Nagpatuloy rin siya sa mga specialized training at seminar sa Japan, South Korea, Italy at United Kingdom, kabilang ang mga programa ng Japan Institute of Invention and Innovation, World Intellectual Property Organization at International Humanitarian Law sa Cambridge University.

Sinimulan niya ang kanyang legal career sa Angara Abello Concepcion Regala and Cruz (ACCRA) kung saan nagsilbi siya bilang senior associate hanggang 1986. Mula 1986, naging Senior Partner siya ng Roco Buñag Kapunan Migallos Perez & Luna Law Offices.

Naging founder at Senior Partner din siya ng Kapunan Lotilla Garcia & Castillo Law Offices mula 2009 hanggang 2011. Noong 2011, itinatag niya ang Kapunan & Castillo Law Offices, kung saan siya ay kasalukuyang Senior Partner.

Malawak ang kanyang legal practice na bukod sa litigation ay sumasaklaw sa licensing, franchising, corporate at commercial law, joint ventures, mergers and acquisitions, international humanitarian law, criminal law, family law, estate law at succession.

## Tagapagtanggol ng kalikasan at karapatan

Isa sa mga naging kapansin-pansing bahagi ng kanyang karera ang kanyang adbokasiya para sa kalikasan. Nakilala siya sa pagkakamit ng Writ of Kalikasan mula sa Supreme Court kaugnay ng West Tower/Barangay Bangkal oil spill case.

Aktibo rin siya sa pagtataguyod ng karapatan ng kababaihan at mga bata, proteksiyon laban sa domestic violence, Safe Spaces Law, climate change, cyberbullying, diversity, equity and inclusivity sa workplace, accountability ng public officers, international humanitarian law at intellectual property.

Dahil sa kanyang mga kasong may kinalaman sa mga artista at sa pagtatanggol sa kanilang equity at royalty rights, tinagurian din siya bilang isang “lawyer for the celebrities.”

## Malawak na propesyonal na serbisyo

Sa kanyang mahabang karera, naging bahagi si Kapunan ng maraming professional organizations sa Pilipinas at ibang bansa.

Kabilang dito ang pagiging Founding President ng Intellectual Property Alumni Association, Past President at kasalukuyang Director ng Intellectual Property Association of the Philippines, Councilor ng ASEAN Patent Attorneys Association at dating Chairman ng Copyright Committee nito.

Naging bahagi rin siya ng Licensing Executive Society of the Philippines, ASEAN Intellectual Property Association, Women’s Business Council of the Philippines at Management Association of the Philippines.

Sa MAP, naging Past Chairman siya ng National Issues Committee at kasalukuyang Chairman ng Arts and Culture Committee. Naging Past Chairman din siya ng UN Women, dating UNIFEM, at miyembro ng Shareholders Association of the Philippines.

Naging Bar Examiner din siya noong 1988 para sa Commercial Law. Naging professional lecturer siya sa International Center for Legal Studies at naging lecturer sa iba't ibang paksa para sa Mandatory Continuing Legal Education (MCLE) ng Philippine Supreme Court.

## Serbisyo sa humanitarian at civic organizations

Hindi lamang sa courtroom umiikot ang kanyang serbisyo.

Naging Governor siya ng Philippine Red Cross at kasalukuyang Counselor at Legal Adviser na kumakatawan sa organisasyon sa mga International Committee of the Red Cross conferences hinggil sa International Humanitarian Law.

Naging Vice Chairman at Trustee rin siya ng Cultural Center of the Philippines, Past President ng Rotary Club of Sampaguita at dating District Legal Adviser ng Rotary District 3800.

Naging Past President at Area Director din siya ng Zonta Foundation Area 5, Past Trustee ng Rustan’s Essenses Foundation, Past President ng Stop Trafficking of Filipinos at naging bahagi ng advisory board ng World Wildlife Fund. Naging Trustee at Legal Adviser din siya ng Ballet Philippines.

## Pamana ng isang pamilya sa batas

Si Kapunan ay anak ni Retired Supreme Court Justice Lino M. Patajo at ni Cristeta Taaca Patajo, na naging Dean ng Manila Doctors School of Nursing at Vice President for Academic Affairs ng UDMC at naging miyembro ng Professional Regulations Board for Nursing.

Biyuda siya ng dating RTC Judge Eduardo Roden E. Kapunan, na naging kaklase niya sa UP Law School.

Mayroon siyang limang anak at tatlong apo. Dalawa sa kanyang mga anak, sina Lino at Choi, at ang kanyang apo na si Kyle Linus ay mga abogado rin. Ang kanyang panganay na anak na si Lino ay kasalukuyang Managing Partner ng kanilang law firm.

## Mga pagkilala

Sa loob ng 47 taon ng kanyang pagiging practicing lawyer, nakatanggap si Kapunan ng iba't ibang pagkilala sa kanyang larangan at mga adbokasiya.

Tatlong magkakasunod na taon, mula 2019 hanggang 2021, kinilala siya bilang kabilang sa Top 100 Lawyers of the Country. Noong 2024, tumanggap siya ng mga pandaigdigang pagkilala gaya ng Women in Law Awards para sa Corporate Law–Philippines, Asia’s Iconic Award for Law at Linguistic Intelligence Award.

Noong 2025, kinilala siya sa Philippine Choice Award for Outstanding Humanitarian Service at tumanggap ng Asia’s Legacy of Justice and Legal Excellence Award sa 2nd Asia’s Golden Legacy Awards.

Nominado rin siya sa Asian Leaders Award 2025 para sa Women of Substance Award. Noong 2024, tumanggap siya ng First Tala Award mula sa Global Artistic Collaboration for Empowerment (GACCE–USA) at ASEAN Women Best Entrepreneur Award.

Kabilang din sa kanyang mga naunang pagkilala ang The Outstanding Women in the Nation’s Service (TOWNS) Award noong 1995 para sa Corporate Law, Outstanding Women of the University of the Philippines noong 1998 at Global Filipina Women Leaders Network (FWN100) Awards noong 2016.

Isa rin siyang distinguished member ng Pi Gamma Mu International Honors Society.

## Boses sa telebisyon at media

Bukod sa pagiging abogado, naging bahagi rin si Kapunan ng media.

Naging host siya ng lingguhang programang “Legally Speaking” sa DZRJ TV at naging co-host sa DZRH. Naging columnist din siya ng BusinessMirror.

Sa kasalukuyan, co-host siya ng lingguhang programang “Laban Para Sa Karapatan,” na napapanood tuwing Sabado mula 11 a.m. hanggang 12 noon sa Aliw23 TV, DWIZ 882, Facebook Live at YouTube.

Kasama rin siya sa “trio tagapagpayo” ng programang “Face 2 Face” sa TV5 at One PH. Madalas din siyang inimbitahan bilang resource person at guest speaker sa mga talk show, forum at conference tungkol sa mga isyung legal at pampulitika, kabilang ang women empowerment, environment, arts and culture, pananagutan ng mga public officer, DEI at LGBTQ+ rights.

Sa mahabang karera bilang abogado, guro, tagapayo, lider ng mga organisasyon at tagapagtaguyod ng karapatan, patuloy na ginagamit ni Atty. Lorna Patajo-Kapunan ang kanyang kaalaman sa batas bilang instrumento ng serbisyo publiko at pagsusulong ng mga usaping may direktang epekto sa lipunan.

MANILA — Sinita at kinastigo ni lead defense lawyer Sheila Sison nitong Miyerkules ang private prosecutor na si Amando Ligutan sa harap ng Senate impeachment court dahil sa isang pahayag nito sa social media na aniya’y tumutukoy sa isang abogado ng defense team ni Vice President Sara Duterte.

Nangyari ang isyu matapos magkaroon ng pagtatalo sa pagitan nina defense counsel Kristine Ferrer at Lorna Kapunan ng prosecution panel habang isinasagawa ang cross-examination kay state auditor Xylene Mae Del Campo tungkol sa paggamit ni Duterte ng confidential funds.

Kinuwestiyon ni Kapunan ang paraan ng pagtatanong ni Ferrer sa witness.

“Misleading questions are not allowed on cross,” ani Kapunan.

Sumagot naman si Ferrer: “They are allowed.”

Makalipas ang ilang oras, bandang 11:29 ng umaga, nag-post si Ligutan sa kanyang Facebook page ng pahayag na:

“A principle ALL lawyers and law students know by heart: Misleading questions are NOT allowed even on cross-examination.”

Sison: Hindi misleading, kundi leading questions ang tinutukoy

Sa kanyang manifestation sa pagtatapos ng paglilitis nitong Miyerkules, nilinaw ni Sison na iba ang sinabi ni Ferrer sa ipinahiwatig ng post ni Ligutan.

Ayon kay Sison, “only saying that leading questions are allowed on cross-examination” ang tinutukoy ni Ferrer at hindi na pinapahintulutang misleading questions.

Kinuwestiyon ni Sison ang pagdadala umano ni Ligutan sa social media ng naturang usapin habang nagpapatuloy ang paglilitis.

“And yet we have a private prosecutor immediately taking to social media and posting this, implying something against the defense counsel. We will not have this,” ani Sison.

Iginiit din niya na hindi nararapat ang ganitong pahayag laban sa kapwa abogado, lalo na’t parehong miyembro ng bar at officers of the court ang magkabilang panig.

Ayon kay Sison, “inappropriate” ang ginawa ni Ligutan at dapat umiral ang respeto sa pagitan ng mga abogado kahit magkabilang panig sila sa paglilitis.

Tinawag din niyang “troubling” at “in bad taste” ang paglalabas ng naturang pahayag sa gitna mismo ng isang courtroom hearing.

Binanggit ni Sison na may mga patakaran ding nagbabawal sa mga abogado na magkomento tungkol sa merits ng kasong dinidinig.

Ligutan: Hindi naman siya pinangalanan

Hindi naman pinayagan ni Senate impeachment court presiding officer Francis Escudero si Ligutan na agad tumugon sa manifestation ni Sison.

Gayunman, tiniyak ni Escudero na mabibigyan si Ligutan ng pagkakataong ipaliwanag ang kanyang panig bago magpasya ang senator-judge sa isyu sa Lunes.

Sa panayam matapos ang paglilitis, iginiit ni Ligutan na wala naman siyang binanggit na pangalan sa kanyang social media post.

“If they felt alluded to, sa kanila na po iyon,” ani Ligutan.

Sinabi rin niyang wala siyang balak burahin ang kanyang post dahil naninindigan siyang hindi pinapayagan ng Rules of Court ang misleading questions kahit sa cross-examination.

“Buburahin ko ba? Hindi allowed ang misleading questions. Hindi ko ’yan buburahin dahil ’yun ang nakasaad sa ating Rules of Court,” ani Ligutan.

Dagdag pa niya, magiging iba sana ang sitwasyon kung tahasan niyang pinangalanan ang sinumang abogado sa kanyang post.

Si Atty. Kristine “Tine” Ferrer ay kabilang sa mga abogado ng defense team ni Vice President Sara Duterte sa nagpapatuloy na impeachment trial sa Senado.

Si Ferrer ay partner sa Fortun, Narvasa and Salazar Law Firm (FNS), kung saan kabilang sa kanyang pangunahing larangan ang arbitration, corporate at commercial practice, corporate rehabilitation, litigation at dispute resolution, at taxation.

Nagtapos siya ng Bachelor in Accountancy sa Ateneo de Davao University at na-admit sa Philippine Bar noong 2011. Bilang certified public accountant-lawyer, mayroon na siyang 15 taon ng karanasan sa legal practice.

Mula tax lawyer hanggang lider sa larangan ng taxation

Sinimulan ni Ferrer ang kanyang career bilang tax lawyer sa Sycip, Gorres, Velayo & Co. Kalaunan, nang sumali siya sa FNS, naging head siya ng tax practice ng kompanya at nag-specialize sa mergers and acquisitions.

Naging bahagi siya ng ilang malalaki at kumplikadong local at international transactions na hinawakan ng law firm.

Kabilang sa mga kapansin-pansing naging papel ni Ferrer ang pangunguna sa team na nag-facilitate sa P25-bilyong tax compromise settlement sa pagitan ng Mighty Corp. at Bureau of Internal Revenue (BIR), na inilarawan bilang isa sa pinakamalaking tax compromise settlements sa bansa.

Naging bahagi rin siya ng pagkumpleto sa mga requirement ng BIR para sa P45-bilyong acquisition ng assets ng Mighty Corp. ng JT International (Philippines), Inc.

Kamakailan, nakakuha rin ang kanyang team ng P152.5-milyong tax refund para sa mga erroneously paid taxes on royalties mula sa Court of Tax Appeals.

May karanasan din sa pagtuturo at debate

Bukod sa kanyang legal practice, naging lecturer si Ferrer sa Taxation Law at Special Proceedings sa Ateneo de Davao University College of Law. Nagturo rin siya ng accounting sa School of Business and Governance ng naturang unibersidad.

Bago man siya nakilala sa larangan ng batas, naging aktibo rin si Ferrer sa debate. Nagkampeon ang kanyang team sa First National Debate on International Humanitarian Law, kung saan siya rin ang itinanghal na best debater ng torneo.

Naging finalist din siya sa unang season ng ANC CVC Law Debates noong 2008.

Mga pagkilala

Ilan sa mga pagkilalang natanggap ni Ferrer ay ang pagiging isa sa “10 Most Successful Leaders to Follow in Asia” ng Tycoon Success Magazine noong 2023 at kabilang sa “Top 10 Consulting Company Leaders from the Philippines” ng CEO Insights Asia noong parehong taon.

Noong 2026, kinilala rin siya bilang Exclusive Member for Corporate Law in the Philippines ng Global Law Experts.

Itinampok din siya ng The Legal 500 Asia Pacific bilang Recommended Lawyer para sa Projects and Energy at Corporate and M&A.

May certification din si Ferrer sa Negotiation Mastery mula sa Harvard Business School Online.

Sa gitna ng nagpapatuloy na impeachment trial ni Vice President Sara Duterte, nakatuon ngayon ang pansin sa mga abogado ng magkabilang panig—kabilang si Ferrer, na may malawak na karanasan sa taxation, corporate law, litigation at dispute resolution.

Uminit ang talakayan sa impeachment trial ni Vice President Sara Duterte nitong Miyerkules matapos magkaroon ng palitan ng argumento ang panig ng depensa at prosekusyon.

Naganap ang tensyonado ngunit nauwi rin sa biruan na insidente habang isinasagawa ang cross-examination kay Commission on Audit Intelligence and Confidential Funds Audit Office (COA-ICFAO) state auditor Xylene del Campo, sa ika-15 araw ng paglilitis.

Nagsimula ang pagtatalo nang hilingin ni private prosecutor Lorna Kapunan kay Senate President at presiding officer Senator-judge Francis “Chiz” Escudero na paalalahanan ang defense counsel na si Kristine Ferrer na huwag pigilan ang testigo habang sinasagot nito ang kanyang mga tanong.

Iginiit naman ni Ferrer na dapat utusan ang testigo na sagutin lamang ng “yes” o “no” ang mga tanong sa cross-examination. Ipinaalala rin niya kay Kapunan na maaari nitong itanong ang iba pang paglilinaw sa redirect examination.

Hindi naman ito sinang-ayunan ni Kapunan at sinabing hindi lahat ng tanong ay maaaring sagutin lamang nang “oo” o “hindi.”

“I’m on cross, your honor,” giit ni Ferrer.

Agad namang sumagot si Kapunan at ipinaalala na may mga limitasyon din ang cross-examination, kabilang na ang pagbabawal sa mga tanong na maaaring makapanlinlang sa testigo.

“Never mind if you’re on cross; there are limits to cross-examination. Misleading questions are not allowed in cross,” ani Kapunan.

Hindi naman umatras si Ferrer at iginiit na pinapayagan ang mga naturang tanong.

Dahil dito, namagitan si Escudero upang pakalmahin ang magkabilang panig. Hiniling niya sa dalawang abogado na huwag nang dagdagan pa ang tensyon sa loob ng impeachment court.

Aniya, huwag sanang hayaang lumala ang tinawag niyang “seeming generational divide” sa pagitan ng dalawang counsel.

“Let’s keep it a notch lower,” pakiusap ni Escudero.

Ngunit sa halip na lalong uminit ang sitwasyon, nagpatawa si Kapunan nang sabihin niyang pinipigilan na lamang niya ang sarili na “spanking” si Ferrer.

“Your honor, please. I am preventing myself from giving her a spanking, your honor,” biro ni Kapunan.

Natawa naman ang mga naroon sa impeachment court matapos ang kanyang komento.

Muling pinaalalahanan ni Escudero ang dalawang abogado na pareho silang miyembro ng bar at pantay silang pakikitunguhan ng impeachment court.

Agad namang sumang-ayon ang magkabilang panig. Nangako rin si Kapunan na “henceforth behave” o magiging maayos na ang kanyang pakikitungo.

Sa pagtatangkang tuluyang maalis ang tensyon, sinubukan naman ni Ferrer na purihin si Kapunan. Sinabi niyang mataas ang respeto niya sa private prosecutor at isa pa nga umano ito sa kanyang mga hinahangaan.

Ngunit bago pa matapos ni Ferrer ang kanyang pahayag, agad siyang pinutol nina Escudero at Kapunan.

“Let’s end here; it might sound like a eulogy, Your Honor. I’m still very much alive,” biro ni Kapunan, na muling nagpatawa sa loob ng korte.

Samantala, muling iginiit ni Ferrer ang kanyang kahilingan na hayaan siyang maisagawa nang maayos ang cross-examination nang hindi napuputol.

Ipinaalala rin niya na noong nakaraang araw ay hindi niya kinulit si Kapunan kahit may mga tanong umano itong maaaring ituring na leading questions na hindi pinapayagan sa direct examination.

“I respected her,” pahayag ni Ferrer.

Sa kabila ng sagutan ng magkabilang panig, nagpatuloy ang impeachment proceedings at ang pagtatanong sa testigong si Del Campo kaugnay ng mga isyung tinatalakay sa paglilitis kay Vice President Sara Duterte.

Isang nakakatuwang sorpresa ang natanggap ni First Lady Liza Araneta-Marcos mula kina Kris Aquino at mga anak nitong sina Bimby at Joshua nang personal nila itong dalawin sa Malacañang.

Ibinahagi ni Liza nitong Linggo sa kanyang Facebook account ang isang larawan kasama ang magkakapamilyang Aquino. Makikita sa harap nila ang apat na birthday cakes na nakalagay sa isang cart.

Kapansin-pansin din ang suot nina Kris at Joshua na kulay dilaw, na matagal nang naging simbolikong kulay na iniuugnay sa pamilyang Aquino at sa mga kilusang kumontra noon sa mga Marcos. Kalaunan, naging kulay rin ito na malapit sa Liberal Party.

Sa caption ni Liza, ipinahayag niya ang kanyang pasasalamat sa ginawang surprise ng magkapatid.

“Thank you Kris, Josh & Bimby for the lovely advanced birthday cakes! Such a thoughtful surprise that truly warmed my heart. Feeling very blessed,” saad ng First Lady.

Magdiriwang ng kanyang ika-67 kaarawan si Liza sa Agosto 21—isang petsang may malaking kahulugan sa kasaysayan ng pamilyang Aquino.

Ito rin ang araw noong 1983 nang paslangin sa tarmac ng dating Manila International Airport si dating senador Benigno “Ninoy” Aquino Jr., ama ni Kris. Ang kanyang pagkamatay ang naging isa sa mga pangunahing pangyayaring nagpasiklab sa EDSA People Power Revolution noong 1986, na nagresulta sa pagpapatalsik sa administrasyon ni dating Pangulong Ferdinand Marcos Sr.

Samantala, ang ina naman ni Kris na si dating Pangulong Corazon Aquino ang naging pangunahing katunggali ni Marcos Sr. sa kontrobersyal na 1986 snap presidential elections.

Sa kabila ng mabigat na kasaysayan at matagal na hidwaan sa politika ng dalawang pamilya, kapansin-pansin ang magandang relasyon ni Kris sa kasalukuyang First Family.

Itinuturing ni Kris sina Liza at Pangulong Ferdinand “Bongbong” Marcos Jr. bilang bahagi ng kanilang extended family. May ugnayan din sa dugo ang dalawang pamilya dahil sa tiyahin ni Liza na si Demetria Sumulong, na naging asawa ng maternal grandfather ni Kris na si Don Jose “Pepe” Cojuangco.

Mas naging malapit muli ang ugnayan nina Kris at Liza matapos makabalik sa Pilipinas ang TV host-actress kasunod ng ilang taong pagpapagamot sa ibang bansa.

Bago pa man makabalik si Kris, nauna nang dumalaw sa First Lady ang kanyang mga anak matapos itong hilingin sa kanila ng kanilang ina.

Mula noon, mas madalas nang nagkakaroon ng pagkakataong magsama sina Kris at Liza para sa tanghalian at iba pang simpleng get-together.

Dahil dito, naging usap-usapan din sa publiko ang tila paglalapit ng dalawang pamilya na minsang naging magkabilang panig sa isa sa pinakamahahalagang tunggalian sa kasaysayan ng politika sa Pilipinas.

Sa ngayon, tila mas nangingibabaw na ang personal na pagkakaibigan at ugnayan ng dalawang pamilya kaysa sa mga hidwaang pampulitika ng nakaraan.