MANILA — Binatikos ng House prosecution panel si Senator-Judge Robin Padilla dahil sa paghahambing nito sa mga alias na ginamit ng mga bayani ng bansa sa mga pangalang lumitaw umano sa acknowledgment receipts ng mga tumanggap ng confidential funds ng Office of the Vice President (OVP).
Ayon kay Lanao del Sur Rep. Zia Adiong, spokesperson ng prosecution panel, tila isang insulto sa alaala at sakripisyo ng mga bayani ang naturang paghahambing.
“With due respect to my brother in faith and sitting senator, those national heroes whose aliases were referenced would probably be rolling in their graves,” ani Adiong.
Tinukoy niya ang mga pangalang “Mico Harina,” “Andy Lim,” “Shane Ngitngit,” at “Xuniso Belat,” na kabilang umano sa mga hindi pangkaraniwang pangalan na nakasaad sa acknowledgment receipts na isinumite ng OVP sa Commission on Audit (COA) kaugnay ng liquidation ng P500 milyong confidential fund nito noong 2022 at 2023.
Ayon kay Adiong, hindi maaaring ituring na kapantay ng mga alias ng mga bayani ang naturang mga pangalan dahil ibang-iba umano ang layunin ng paggamit nito.
‘Hindi dapat ganoon ang analogy’
Ipinaliwanag ni Adiong na ginamit ng mga bayani ang kanilang mga alias habang nagsasagawa ng mga aktibidad na may kaugnayan sa pakikibaka para sa bansa.
“Their death, the sacrifices they have made, are opposite to the very practice of which these confidential funds were handled,” ani Adiong.
Dahil dito, sinabi niyang hindi dapat gamitin ang mga bayani bilang paghahambing sa mga pangalan ng mga indibidwal na lumitaw sa mga dokumentong sinusuri sa impeachment trial ni Vice President Sara Duterte.
Sumang-ayon din kay Adiong si La Union Deputy Speaker Paolo Ortega V.
Ayon kay Ortega, may malinaw na dahilan kung bakit gumamit ng aliases ang mga bayani—upang maprotektahan ang kanilang pagkakakilanlan habang ipinaglalaban ang kanilang layunin para sa bansa.
“Hindi po sila bumuo at gumawa ng mga aliases para po magawa po ’yung ginagawang ‘Chichirya Gang’ scam,” ani Ortega.
Tinukoy niya ang mga pangalang iniuugnay sa confidential fund recipients na kahawig ng mga pangalan ng junk food brands, gaya ng Mary Grace Piattos at Chippy McDonald.
Padilla: Mahalaga ang aliases sa confidential operations
Sa panig ni Padilla, ipinagtanggol niya ang paggamit ng aliases bilang mahalagang bahagi ng mga confidential at delikadong operasyon.
Kabilang sa mga halimbawang binanggit niya ang mga alias na “Dimasalang,” “Siling Labuyo,” “Maypag-asa,” “Magtalo,” at “Leon Kilat.”
Ayon kay Padilla, ginagamit ang mga ganitong pangalan upang maprotektahan ang pagkakakilanlan ng mga taong sangkot sa sensitibong operasyon, partikular noong panahon ng digmaan.
Binanggit din niya ang yumaong opposition senator na si Benigno “Ninoy” Aquino Jr., na gumamit ng alias na “Marcial Bonifacio” nang bumalik sa Pilipinas mula sa pagkakatapon noong 1983.
Bam Aquino: ‘Walang confidential funds si Ninoy’
Tumugon naman si Senator-Judge Bam Aquino, pamangkin ni Ninoy, sa argumento ni Padilla.
Kinilala ni Bam na gumamit ng alias ang kanyang tiyuhin, ngunit binigyang-diin niyang walang confidential funds si Ninoy at hindi kabilang ang kanyang pangalan sa mga acknowledgment receipts na sinusuri sa kasalukuyang impeachment trial.
Ang usapin tungkol sa mga alias ay bahagi ng mas malawak na pagtatalo sa impeachment proceedings kaugnay ng paggamit at liquidation ng confidential funds ng OVP noong 2022 at 2023.
