Naging sentro ng pagtatanong ni Senator-Judge Robin Padilla ang paggamit ng aliases kaugnay ng usapin sa confidential funds sa isinagawang pagdinig ng impeachment trial ni Vice President Sara Duterte.
Sa kaniyang pagtatanong sa prosecution counsel na si Atty. Mae Divinagracia, iginiit ni Padilla na maging ang mga bayani ng Pilipinas ay gumamit umano ng mga alias.
“Naniniwala po ba kayo na ang ating mga bayani ay may mga alias?”
Bilang tugon, sinabi ni Divinagracia na sa ilalim ng Anti-Alias Law, hindi naman ganap na ipinagbabawal ang paggamit ng ibang pangalan, basta’t inihahayag ang tunay na pangalan. Ipinaliwanag din niya na may konteksto ang paggamit ng aliases noong panahon na nasa digmaan ang bansa.
Muling nagtanong si Padilla kung hindi maituturing na digmaan ang pakikipaglaban ng pamahalaan sa New People’s Army (NPA), na aniya ay gumagamit din ng mga alias.
Gayunman, nilinaw ni Divinagracia na magkaiba ang internal armed conflict at ang konsepto ng war, kaya hindi maaaring basta paghambingin ang dalawang sitwasyon.
Ang palitan ng tanong at sagot ay bahagi ng talakayan sa impeachment trial na nakatuon sa mga isyu kaugnay ng paggamit at paghawak sa confidential funds.
