Isang ma-swerteng mananaya ng Mega Lotto mula sa Baguio City
ang nag kubra ng kanyang panalo na nagkakahalagang mahigit P62.7 milyon jackpot
prize sa draw noong Pebrero 18, 2022.
Isang babae ang nanalo, ayon sa Philippine Charity
Sweepstakes Office, na ayon sa kanya ay napanaginipan niya ang mga numerong kaniyang
tinayaan na 04-06-16-29-30-31.
Marami ang nagsasabi na kapag nanaginip ng mga numero at
kung ito ay iyong matatandaan, dapat itaya mo ito sa Lotto dahil maaaring ito
ang swerte mo.
Ayon sa babae, 18 taon na siyang tumataya ng Lotto at baka
sakaling isang araw ay palarin na manalo ng Jackpot prize.
Nang tanungin kung ano ang kanyang plano sa perang
napanalunan, pahayag niya; “Mag-i-invest ako sa isang maliit na property,”
Maliban dito ay ibabahagi din niya sa pamamagitan ng
pagtulong sa iba ang nakamit na biyaya.
Noong Enero naman ay isang lolo na taga Leyte ang naging
instant milyonaro matapos na manalo sa lotto na P142 milyong jackpot prize ng
Super Lotto 6/49.
Nahulaan naman daw ni lolo ang Super Lotto winning 6/49
numbers na 02-05-04-31-01-46, na kanyang nakubra noong Enero 27 sa PCSO central
office sa Mandaluyong.*
Si lolo naman ay regular ding tumataya ng Lotto sa loob ng
labinlimang taon. At ayon sa kanya, ang perang napanalunan ay kanyang gagamitin
para makabili ng mga ari-arian na para sa kanyang mga anak.
At para hindi mawalan ng kita ay mag-iinvest din si lolo sa
maliit na negosyo at sariling Lotto outlet.
Kamakailan naman ay inulat ng PCSO na tatlo sa mga tumama sa
mga lotto draw ay hindi pa nakukuha ang kanilang premyo hanggang ngayon na may
kabuuang P98 milyon sa magkakahiwalay na draw.
Dalawa sa mga ito ay nanalo noong Hulyo 2021 pa, kaya
nanawagan ang ahensya na kunin na ito ng mga bettors hanggang Hulyo 26, 2022
dahil maaari itong ma-forfeit.
Nilinaw ni Arnel Casas, PCSO officer-in-charge general manager
at Assistant Manager ng Management Services Sector na hindi maaaring i-claim
ang premyo kung nawala ang winning tickets.
