 |
| Larawan mula sa Facebook |
Sa kulungan ang naging bagsak ng isang misis na nagwala at
nambato ng humidifier sa isang promodiser sa loob ng isang mall sa Cebu City.
Ang suspek ay kinilalang si Medilina Berja Yamasaki,
33-anyos, ay nahuli sa kanyang condo matapos ireklamo ng biktimang si Jennifer
Fabillar, 26-anyos sa Mabolo Police Station.
Noong una ay tumangging mag bigay ng pahayag si Yamazaki,
ngunit ayon sa isang ulat ng KAMI ay nagsalita na umano ito.
Ayon sa Cebuanang kinasal sa isang Japanese, ipinahiya siya
ni Fabillar sa harap ng kanyang anak, bagay na kanyang ikinagalit na humantong
sa pambabato ng humidifier sa sales assistant.
Sinabi naman ng chief ng Mabolo police station na si Major
Dindo Juanito Alaras na base sa salaysay ni Fabillar, pinaalalahan lamang niya
ang ginang na huwag i-testing ng matagal ang humidifier.
Medyo tumagal umano ang pag testing ni Yamazaki na posibleng
ikasira ng produkto at kapag nasira ay kailangan niya itong bayaran.
Sa naturang video, makikitang nagsisigaw si Yamazaki at dalawang
ulit pang binato ang empleyado ng mall.
Giit naman ni Yamazaki, siya ay napahiya sa kanyang anak dahil
sa sinabi ni Fabillar kaya nagawa niya ang bagay na iyon.
Hinala naman ng mga pulis, maaring wala sa katinuan ang
ginang nang mga oras na iyon. Subalit hindi rin nila makumpirma dahil
tumangging sumailalim sa medical exam ang suspek bago makulong.
Nagtamo pa ng sugat at pasa sa ibabang bahagi ng kanang mata
ni Fabillar dahil sa insidente kaya sinampahan niya ng kasong physical injury
si Yamazaki ngayong araw ng Lunes.
